فلسفة الـ ALT + F4

كنت بتفرج على الفيديو ده لأشرف حمدي.. وقررت إني أعمل ليستة مشابهة للفكرة.. 

 مجرد تدوينة خفيفة.. 

لو عندي (ألت + فـ 4) في حياتي:

- كنت هقفل ماسبيرو

- وبالمرة أقفل راديو مصر والفراعين والأهرام (والأخبار والجمهورية)

- وكنت هقفل كلام تيتا اللي بتقولي "يا محطمة القلوب"

- وكنت هقفل الدائري.. عشان طويل وبايخ

- وكنت هقفل تتنيحتي في أول أيام الاجازة (قمة أيام الفراغ)

- وكنت هقفل بقي.. عشان ماكولش شيكولاته وشيبسي كتير (.. من توابع قمة أيام الفراغ)

- وكنت هقفله شخصياً. الحقود.

- وكنت هقفل اللي يقولي "أنا ست وعارفة حركات الستات، البنت دي كانت نازلة قاصدة تتعرى، ايه اللي ملبسها أزرق؟"

- وكنت هقفل أكاونت وائل عباس على تويتر (أو على الأقل الشتائم اللي بيقولها)

- وكنت هقفل كلمات "لم ولن" اللي واجعين بها دماغنا، و"ممنهجة" و"الايقاع" و"حرق" و"خارجية"..

- وكنت هقفل التافهين اللي بيعاكسوا

- وكنت هقفل الوضع اللي بيخليني مش عارفة أخرج براحتي وأحضر كل اللي عايزاه في أي وقت

- وكنت هقفل الناس اللي بتتكلم أثناء العروض/الحفلات وتعلق من غير سبب

- وكنت هقفل البنات التافهة اللي بتتخانق بتفاهة زيها

- وكنت هقفل الجدال لأجل الجدال

- والجدال في أمور فرعية

- والجدال بدون ثقافة

- والتمسك بالرأي المتعنت

- وكنت هقفل الصوت العالي 
- وكنت هقفل الزبالة في الشارع
- وكنت هقفل الجهل
- والظلم
- وكنت هقفل سلك الدفاية اللي بيلمس
- وكنت هقفل الموتوسيكلات كلها

بس بجد.. 

كنت هقفل القلق والتردد وأبقى بنت شديدة كده. في كل حاجة. 

أبقى بت شديدة كده، أخوف الناس، يهابوني، يعملولي حساب، ماحدش يقدر يقول لي كلمة، العيال تسمع اسمي تترعش، الراجل يقعد في بيتهم من المغرب لما يعرف إني نازلة الشارع، الست ماتستجراش توريني وشها. أشكمهم كده، مايقدروش حتى يفكروا فيا وهما لوحدهم في البيت. أمال ايه. وأغير اسمي: أخليه عبد الجبار عباس الضبع الشهير بالسفاح.. أو نظيمة العشماوي الشهيرة بنجمة البقشيش.